Bai a ser apersentado an ne próssimo Sábado, die 28 de Febreiro, a las seis de la tarde, an la Lhibrerie Almedina de l Centro Comercial Arrábida Shopping (çoto 158 A-B) an Bila Nuoba de Gaia, l lhibro «Teatro Popular Mirandês: Textos de Cariz Profano» («Triato Popular Mirandés: Testos de Cariç Profano»), que fui eiditado pul GEFAC - Grupo de Etnografia e Folclore da Academia de Coimbra («Grupo d'Eitnografie i Folclore de lAcademie de Coimbra») i pula Eiditora Almedina nes finales de l anho passado, tal cumo anformou l Diário de Trás-ls-Montes.
Na sesson dapersentaçon de l lhibro, haberá bárias palhestras: de l Porsor João Maria André (Faculdade de Letras de lOunibersidade de Coimbra, i Diretor de l Triato Académico de Gil Vicente), de l Porsor Adérito Araújo (Ounibersidade de Coimbra, i diretor de l GEFAC), de la Porsora Ana Maria Brito (Persidente de l Departamiento de Studos Pertueses i Studos Románicos de la Faculdade de Letras de lOunibersidade de l Puorto - FLUP) i de l porsor António Bárbolo Alves (scritor i porsor de Lhéngua Mirandesa).
L porsor António Alves tamien fazerá lapersentaçon de l Curso Libre de Mirandés que tenerá lhugar an la FLUP a partir de l próssimo die 8 de Márcio. Bede mais anformaçones subre esse curso noutro teste de l Diário de Trás-ls-Montes.
Puode-se sacar mais anformaçones subre este nuobo lhibro ne l andreço web http://www.ci.uc.pt/gefac/livro/livro.html .
